هل أنت راض عن المدونة شكلا و موضوعا
موضوعاً أكيد وإلا ما كنت استمريت ولكن هذا لا يغني عن التجديد والتحدث دائما في مواضيع جديدة … شكلاً، صراحة انا مو كتير شاطرة بهاي الأشياء وما عندي معرفة ببرامج الديزاين والسي اس اس، حتى لما عملت هدا البلوغ، صديقي الموقر جاد قام مشكورا بوضع هذه اللمسات وانا ممنونة كتير وحابة اللوك الحالي … ات ليست فور ناو

هل تعلم أسرتك الصغيرة بأمر مدونتك؟
آه كلهم بيعرفوا بس مو كلهم متابعين … عادي، الجميع مرحب فيه عندي

هل تجد حرجا في أن تخبر صديقا عن مدونتك؟ هل تعتبره أمرا خاصا بك
أكيد لا، بالعكس كتير بحب انه اصدقائي يتابعوا ماي بلوغ ويعطوني رأيهم في اللي بكتبه والحمدلله مو مقصرين

هل تسببت المدونات بتغيير ايجابي لأفكارك؟ أعطي مثالا في حالة الإجابة بنعم
أكيد، لأنه من خلال هدا البلوغ تواصلت مع ناس من مختلف العقليات والجنسيات وهاي شغلة كتير ايجابية، بعدين من خلال التواصل مع البلوغرز صار عندي أمل انه لسه عندنا ناس بتفكر ومتحدثة وبتعبر عن آرائها بحرية، وأكيد أهم شغلة انه صار عندي أصدقاء كتير من هالمجتمع البلوغرجي
شغلة تانية مهمة اني صرت ما اسكت عن حقي ابدا يعني البلوغ رجعلي صوتي

هل تكتفي بفتح صفحات من يعقبون بردود في مدونتك أم تسعى لاكتشاف المزيد
بحب دايما أعرفهم اكتر من خلال ذير بلوغز بس كمان بنفس الوقت بحب دايما اشوف الجديد والافكار الجديدة من البلوغرز الاحدث عمرا (بالسنوات البلوغرجية طبعا)

ماذا يعني لك عداد الزوار ؟ و هل تهتم بوضعه في مدونتك؟
كان بالاول موضوع كتير مهم بالنسبة الي بس انا هلأ بهتم بالنوعية أكتر

هل حاولت تخيل شكل أصدقائك المدونين؟
لا، ولا عمره خطر الموضوع على بالي ولما بيجي على بالي اشوف حدا بسألهم أو بستنى للميتنغ تاع البلوغرز عشان اربط الصورة بالفكر، هيك أحسن واهدى بال

هل ترى فائدة حقيقية للتدوين؟
طبعا والا ما كنا كلنا هون

هل تشعر أن مجتمع التدوين مجتمع منفصل عن العالم المحيط بك أم متفاعل مع أحدا
اكيد لا بدليل انه أغلب المواضيع المذكورة على البلوغز اذا مش كلها بتحكي عن أشياء من واقعنا وهدا اللي بيعطي مصداقية أكتر وبيخلينا دايما على تواصل مع محيطنا
هل يزعجك وجود نقد بمدونتك أم تشعر أنه ظاهرة صحية؟

أكيد لا، لأنه اللي بده يكتب آراؤه للناس تقرأها بده يتوقع انه في ناس رح توافق وفي ناس رح تعارض، هاو ايفر، لما بيصير النقد شخصي وبيتعدى الحدود الأدبية في النقاش ساعتها بيبطل نقد وبيتحول لذم أو سب، سموه مثل ما بدكم، بس اكيد مش نقد

هل تخاف من بعض المدونات السياسية و تتحاشاها؟ هل صدمك اعتقال بعض المدونين
لا ليش بدي أخاف؟ ولا ما انصدمت

هل فكرت في مصير مدونتك في حال وفاتك؟
انا ما فكرت بالممتلكات العينية ولا الأذنية ولا الأنفية ولا البلوغرجية … وبعدين بعد ما اموت يا جماعة، ماي بلوغ رح يموت معي لأنه جزء مني ورح نصير انا وهو ذكرى

من تشعر أنه يشبهك من المدونين؟
في البعض بيحكوا بنفس المواضيع اللي انا بحكي فيها وفي كمان اللي بيطابقني بالتفكير لكن مو بالاسلوب، وفي اللي انا بختلف معاهم شكلا وموضوعا لكن في النهاية، ما في اي اتنين بيشبهوا بعض وهدا الحلو بالبلوغز، انه كل حدا اله اسلوبه وطريقته اليونيك

تحب تسمع إيه؟
فيروز وكل ما هو قديم أو جديد بس من مستوى عالي مش تقولولي واوا!!!

أكتب أسماء خمسة مدونين ليقوموا بهذا الاستقصاء بعدك
يا ام بدوي بلاش … هاهاهاها
أجهد بلا مين؟
ما قلتلك بلاش يا ام بدوي