الغريب إنه هدا المسلسل معروض على كل القنالات، الأرضية والفضائية … مع إنه الواحد بيحضر الحلقة منه عدة مرات … غصب عنه طبعاً … والغريب كمان … إنه كل القنالات بتحط الحلقات بنفس الموعد … صعب كتير انك تحضر الحلقة كاملة عن طريق اختصار الوقت والقفز بين القنالات … حاولت وما زبطت معي ..

المسلسل اللي بقصده هو اللي بيبدأ بـ “حياتي من غيرك شوربة” و “دكوق المكايكونوكيز” وينتهي بعطر “حليمة ماجيك” …

بس في مشكلة كتير كبيرة … عم يقطعوا هالمسلسل بدعايات لنور الشريف ويحيى الفخراني وإلهام شاهين وجمال سليمان وغيرهم … يعني عن جد عن جد … صارت شغلة دعايات هدول الفنانين مملة كتير وبلا طعمة … شو يعني يضلهم يقطعوا علينا المسلسل اللي احنا متابعينه في كل القنالات عشان يحطولنا شوية دعايات لفنانين؟؟

أنا فاهمة إنه القنوات المفتوحة والمجانية عايشة من ورا الدعايات … بس والله شي مبالغ فيه … يعني بدل ما هو المسلسل أربعين دقيقة … بيصير ساعة من ورا فترات الإعلان المتكررة بشكل ممل … ويعني كمان نفس الدعايات عم تنعرض بكل الفترات … طيب والله شي بيزهق … يعني ليش ما يعملوا فترات محدودة … طالما بيحطوا نفس الدعاية أربع أو خمس مرات في الحلقة الواحدة … المشاهد ما رح يقرر إنه يقوم ركاض على الدكانة عشان يشتري المايونيز المشقلب … ولا رح ينزل على البنك يفرط المليون عشان يشتري الجيمس السوبر بان … الرحمة مطلوبة

وبتلاقي حالك مجبور تحظر مسلسل الدعايات الممل … حتى لما بتحاول تغير القنال … بتلاقي بيبسي وراك وراك … ما تحاول … :انه كل القنالات متفقة تنزل مسلسل الدعايات بنفس الوقت … يعني عن جد … اففففففت