كل يوم عم بلاحظ إنه الناس كثير تغيرت عن زمان، يعني ما بعرف من وين جايبين عدم الإحساس وانعدام المسؤولية اللي قاعدين بنشوفه. زمان كانت الناس تخاف على بعض وتهتم برضا أو زعل اللي حواليهم لأنه الشعار كان: الناس لبعض
لكن اللي بنشوفه اليوم اشي مختلف كثير، الكل حامل شعار: اللهم نفسي

يعني الحكومة فرضت عقوبات كثيرة على بعض التجاوزات اللي بتعملها الناس ومع ذلك، لا حياة لمن تنادي كأنها شطارة إنه الواحد يخالف القوانين. كل القوانين والعقوبات المفروضة على إطلاق الألعاب النارية بعد الساعة العاشرة ليلاً ولا زالت الناس بتطلق مدافع نارية بعد نص الليل كأنه ما في ناس نايمة عشان عندها شغل الصبح، وكأنه ما رح تصحى من النوم مفزوعة على صوت الحرب اللي قايمة في السما، وكأنه ما في أطفال نايمين وأهاليهم ما صدقوا انهم يناموا، وكأنه ما في ختايرة تعبانين أو مرضى، بس هذا كله ما اله قيمة عشان الناس بدها تفرح كل الناس لازم تفرح معاها بالغصب مو بالرضا.

بعدين دايما بالصيف بتكثر الحفلات والأعراس وهذا شي عادي، بس اللي مش عادي إنه الناس تسكر الشوارع على السيارات والمشاة عشان تستضيف الناس في صيوانات منصوبة في نص الشارع ولعدة ليالي. اللي طريق بيته من هناك، فرصة يشوف طريق ثاني لأنه الجماعة تملّكوا الشارع وبدهم يفرحوا، ومش مشكلتهم إنك ما الك طريق ثاني فيا أخي لا تكبر الموضوع كثير وخلي عندك إحساس مع العالم، الناس بدها تفرح فلا تخرب عليهم فرحتهم …

بتروح على أي دائرة حكومية أو على بنك وبتلاقي الدور طالع لبرّة، وعشان انت مضطر، بتوقف في الدور زيّك زي غيرك، بس فجأة بطلعلك واحد بياخد دورك بكل وقاحة. مش ضروري يوقف قدامك بالزبط عشان ياخد دورك، لوو تعدى على أي واحد من اللي قدامك فهو تعدى عليهم وعليك بنفس الوقت واللي بيسطح إنه في كثير ناس بتقبل بهالمعاملة بدون ما يحكوا اي شي … نفس الشي بيصير عند الكاش، بتلاقي واحدة أو بالعادة واحدة بتدحش حالها قدامك بحجة إنه ما معها أغراض كثير، طيب شو يعني؟ وقتها أهم؟ هي أهم؟ ليش بتستبيح لنفسها إنها تسرق مكاني ووقتي وبنفس الوقت إذا انا احتجيت بصير سوفاج وعديمة الإحساس …

الأسبوع الماضي رحت أنا وأختي على سوق الجملة (السيفوي) في المقابلين، وعينك ما تشوف إلا النور، المحل مليان لبابه عشان حملة التخفيضات الخاصة (العودة إلى المدارس)، وطبعا ما بيحلى تبديل الشفت على الكاش إلا وهم الناس واقفين طوابير، ولما موظفين الكاش بيبدلوا الشفت بيكونوا سريعين كثير، لدرجة إنه الناس بتعوف حالها وهي بتستنى ولما أخيراً يفتحوا الكاش، الموظفين كالعادة مكشرين ومش متحاكيين … بعد ما خلص مسلسل تبديل الشفت، وصلنا لعند الكاش وكان في واحد قدامي ما شاء الله معبي العرباية لبابها حتى إنه صار يحط الأغراض تحت واشي بإيده كمان، شغل مدارس يعني ومونة للبيت، دفاتر واقلام وشنتات وخلافه، لما خلص كل الأغراض وفتح الكاش، طلع ما في فكة، فراطة يعني، وقعدنا فوق الخمس دقايق نستنى الفراطة لأنه الموظفين عم بيحكوا مع بعض ومطنشين الناس اللي واقفة، ولما أخيرا اجت الفراطة بعد ما فرفطت روحنا، وصل دوري، طلع حسابي 27 دينار وكسور، أعطيته 50 دينار، يعني لازم يرجعلي 22 دينار وكسور، قام رجعلي 42 دينار وكسور فأنا على طول قلت: لحظة، الظاهر في غلط، انت رجعتلي أكثر من اللازم، فراح جاحرني، وأخد العشرين دينار مني وقال بعصبية: خلص خلص هيك مزبوط، ولا شكراً ولا آسفين، ولا كأني عملت فيه معروف لأنه العشرين دينار كانت رح تصير عجز في صندوقه وتنخصم عليه … هزيت راسي وطلعت لأنه الحكي بهيك ناس، خسارة!!

بيقلك القيادة ذوق وأخلاق بعدين بتيجي المهارة، بس اللي صاير عندنا العكس تماماً، مش بس ما بيعرفوا يسوقوا، إلا كمان بيطاحشوا العالم اللي في الشوارع كأنها الشوارع مسمية باسمهم … في أيام الصيف، في حوالي 300 ألف سيارة بتلف بشوارع البلد في أي لحظة، وهيك عدد بيتطلب إنه الناس تتحمل بعض شوية علشان ما يصير مليون ألف حادث كل يوم ولو إنه وجود القلابات والشاحنات اللي شوية بتطير بالسما من كثر السرعة ممكن يؤثر شوية على الموضوع …

بستغرب ليش ما يكون في مخالفات على هيك تجاوزات؟ لو اللي بينصب صيوان في الشارع بيعرف إنه رح يدفع مخالفة وقدرها، فكركو بيخالف؟ لو اللي بيطلق المدافع النارية بعد نص الليل بيعرف إنه رح يتخالف ويدفع، فكركو بيكون فرحان؟ يعني ما بيزبط نمشي على القانون؟ ليش لازم نندفش على الموضوع؟ ليش دايماً بنطنش المصلحة العامة وبس بنسأل عن حالنا؟ والله اشي بسطح